Guguritan/ Dangding

Asih Pasini

Ku Hernisa A. Nugraha

Kembang bungur jeung kembang malati

Mawar bodas Kananga campaka

Éndahna teu kapaliré

Éstu seungit nataku

Sumeleber kaangin-angin

Eunteup kana lahunan

Diseuseup diambung

Matak tingtrim kana manah

Duh jungjunan kadeudeuh atos katampi

Meungkeut asih nu urang

Rasa sono jeung rasa kaasih

Matak hésé diragap disawang

Mangkak ngembang dina saré

Moal bisa dirahul

Kumalangkang kaimpi-impi

Henteu matak kaluman

Ngaliwat ngalangkung

Bulak balik dina mata

Duh bébéné ubaran ieu kasakit

Dina tepang munggaran

Raray tineung pajonghok pasini

Mindo asih harepan katresna

Saucap megatkeun simpé

Ngudar kiceup nu lungguh

Sakecapna paheut na ati

Nyukcruk jero implengan

Kadeudeuh nu agung

Meungkeut jangji handap mega

Duh kameumeut sampaykeun raga kasuci

Héman cinta duaan